A. (Ángel Santos, 2002)

7 Xuño, 2011 (10:11) | Ángel Santos, Ficción |

A. (2002)
Dirección e guión: Ángel Santos Touza
Intérpretes: Carolina Cabrerizo, J.Joaquín Gracia e Juan A.Moreno.
Duración: 12 minutos
Sinopse: Unha moza interrógase sobre a súa vida e sobre as relación coa xente que a rodea. Xiros, amor, tomas de decisión, xuizos, reproches, acertos, erros, desesperos… Curtametraxe dixital feita no marco do proxecto de estudos do CECC.

ÁNGEL SANTOS naceu en Marín, Pontevedra, en novembro do 76, estudou Historia da Arte en Santiago de Compostela e ao rematar trasladouse a Barcelona para realizar primeiro un curso de guión e finalmente diplomarse en Dirección Cinematográfica no Centre d’Estudis Cinematogràfics de Catalunya (CECC). O seu primeiro traballo importante é a curta A. (2002), que lle abre as portas para a realización dunha curta en formato cinematográfico: Septiembre (Los amores jóvenes) (2004), que chega a estrearse nos cines Casablanca de Barcelona. Xa de volta a Galicia imparte cursos de cinema para rapaces de primaria e colabora na realización de videoclips (Austria, MPSTK, Sugar Mountain). En 2008 presenta O cazador, adaptación dun texto de Chejov que é considerada unha das mellores curtametraxes do ano pola revista Cahiers du Cinema España. A peza vén de ser editada en DVD como complemento ao filme Singularidades de uma rapariga loura de Manoel de Oliveira.
A súa carreira como cineasta prosegue coa curta Sara y Juan e unha primeira incursión no ensaio documental, Fantasmas #1, visto no Festival de Xixón 2010. Actualmente traballa na posprodución da súa primeira longametraxe, Dos fragmentos / Eva, protagonizada por Iria Pinheiro, Isak Ferriz e Fernando Tielve. Alén do seu traballo como creador, dá clases de cinema na universidade e colabora como crítico na revista dixital Miradas de Cine.

Bs. As. (Alberte Pagán, 2006)

17 Marzo, 2011 (15:06) | Alberte Pagán, Experimental, Non ficción | 1 comment

Bs. As. (2006)
Dirección, guión, fotografía e montaxe: Alberte Pagán
Duración: 1h 19 min
Sinopse: “Bs. As.” é umha película sobre Buenos Aires e a sua relaçom com Galiza (sobre a emigraçom, portanto). “Bs. As.” escaravelha nas misérias, nas tragédias, nos traumas, nas separaçons, nos desencontros que a emigraçom conleva, e que a dia de hoje ainda perduram. Numha primeira parte, que poderíamos chamar prólogo, umha série de velhas fotografias reflictem o devir histórico dumha família, tam ligado a América. Estas fotografias serám a ancorage gráfica do relato que se desenvolverá a continuaçom. E falamos bem de relato, porque a voz tem grande importância na obra. Primeiro, umha voz nostálgica, desde aqui, desde Galiza, desde o passado buscando o presente, desde a ausência buscando a presença. A segunda parte do díptico (ambas secçons tenhem necessariamente que estar separadas, pola história, polo océano, pola distância, polo tempo, a máis terrível das distâncias) contém umha voz do presente, do lado de alá, num idioma alheo. A primeira voz é ancestral, oral: contos de inverno contados ao pé da lareira. A segunda é escrita, epistolar, moderna. Acodim a umha leitora com acento, emigrante tamém ela, porque o acento é a característica primeira do emigrante, o que o identifica, o que o discrimina. O epílogo é umha longa viage em metro: é a despedida, o afastamento da grande urbe. Nom hai contacto, nom hai voz: o machacom e obsessivo traqueteo das rodas nos raís percute na conciência do viageiro, do espectador, tomando o lugar das palavras e da dor que estas expressam.

Festival de Xixón 2006
Festival Punto de Vista 2007
Festival de Las Palmas 2007
Play-Doc 2007 (Premio Foco Galiza)
II Prémio Román Gubern (UAB)

ALBERTE PAGÁN naceu no Carballiño en 1965. É autor de varios textos sobre cinema: Introdución aos clásicos do cinema experimental, Imaxes do soño en liberdade: o cinema de Eugenio Granell, do capítulo dedicado ao cinema underground estadounidense no libro Dentro y fuera de Hollywood, o ensaio Residuos experimentales en Arrebato aparecido en Arrebato… 25 años editado pola Filmoteca Valenciana, e do libro A mirada impasíbel. As películas de Andy Warhol, primeira parte. Tamén escribiu A voz do trevón. Unha aproximación a Finnegans Wake, ensaio sobre a derradeira novela de James Joyce. Como director fixo as películas Como foi o conto, Os waslala, Bs. As. (seleccionada nos festivais de Xixón e Pamplona e Premio Romà Gubern), Pó de estrelas (Festival de Pamplona), Tanyaradzwa, Eclipse